“ከምቲ ንኣምላኽ ኣብ ፍልጠቶም ክሕዝዎ ዘየቋጸርዎ፡ ኣምላኽ ከኣ ከምኡ ዘይንቡር ክገብሩ ንሕሱር ኣእምሮ ኣሕሊፉ ሃቦም” (ሮሜ 1፡28)

ኣእምሮ ዝሕዞ ብዙሕ ዓይነት ፍልጠት ኣሎ። ሰባት ከከም ዝንባሌኦም እተፈላለየ ዓይነት ፍልጠት ክሕዙ ይደልዩ። “ፍልጠት የናግፍ” ይብለና ቃል ኣምላኽ። እዛ እንርእያ ዘሎና ዓለም ድማ፡ ሳላ ፍልጠት ካብ ብዙሕ ዝዓይነቱ ምድራዊ ድንቍርና ተናጊፋ፡ ኣብ ዝለዓለ ጥርዚ ምዕባለ በጺሓ ንዕዘባ ኣሎና። እዚ ፍልጠት እዚ ምድራውን ሓላፍን እዩ። ኣብ መንጐ እዚ ብዙሕ ዝዓይነቱ ፍልጠት ግና፡ ሓደ ኣዝዩ ዝኸበረ ፍልጠት ኣሎ፡ ንሱ ኸኣ ፍልጠት ኣምላኽ እዩ። እዚ ኵሉ ምድራዊ ፍልጠት፡ ምድራዊ ምንጋፍ ጥራሕ እዩ ዝህበካ። ንኣምላኽ ምፍላጥ ድማ መንፈሳውን ዘለኣለማውን ምንጋፍ ይህበካ። ሰባት ካብቲ ብዙሕ ዝዓይነቱ ፍልጠት፡ ንፍልጠት ኣምላኽ ኣብ ኣእምሮኦም ቦታ እንተ ዘይሂቦምዎ፡ እቲ ንዅለንትና ሰባት ዝቆጻጸር ኣምላኽ ንኣእምሮኦም ንሕሱር ነገር ኣሕሊፉ ይህቦም። እቲ ንዅሉ ዝጠቅም ፍልጠት ኣምላኽ እንተ ሒዝና፡ ኣእምሮና ንኽቡር ነገር ስለ ዝውፈ ምድራዊ ይኹን ሰማያዊ ሓሳባትና ዝኸበረ እዩ ዝኸውን። “ክቡር ሰብ ግና ክቡር ነገር ይሓስብ፡ ኣብ ክቡር ነገር ድማ ይጸንዕ”። (ኢሳ 32፡8፣ ሆሴ 6፡3፣ ሆሴ 4፡6፣ 2ጴጥ 3፡18)

ኣስተንትን

1. ንኣምላኽ ምፍላጥ እንታይ ማለት እዩ፧

2. ሰብ ብዘይምፍላጡ ዝበደሎ በደል ከም በደል ይቑጸረሉዶ፧

3. ፍልጠት ከመይ ገይሩ ሓራ የውጽእ (የናግፍ)፧

ኣምላኽ ንዕኡ ካብዘይ ምፍላጥ ስለ ዝባልሃና ነመስግኖ። ንእኡ ብምፍላጥ ክንዓቢ ድማ ናብ እግዚኣብሔር ንጸሊ።

ይትባረክ እግዚኣብሔር ኣምላከ ኣበዊነ።

መህ