ናይ ዕለቱ ምንባባት ወንጌልን ምስባክን (በዓለ ጥምቀት ሰንበት ኪውዕል ከሎ።)

ዲያቆን:- ቲቶ  3፣4-8 (Titus)
ተሓጋጋዚ ዲያቆን:- 1ይ ዮሃ 5፣ 5-13 (1 John)
ተሓጋጋዚ ካህን:-  ግብ  10፡34-39 (Acts)
ካህን:- ማቴ  3፡1-17 (Matthew)
ያሬዳዊ መዝሙር:- መዝሙር፡-  ኣጥመቆ ዮሃንስ
መዝሙር ዳዊት፡- ባህርኒ ርእየት ወጎየት፤ ወዮርዳነስኒ ገብኣ ድህሬሁ፤ ኣድባር ኣንፈርኣጹ ከመ ሓራጊት።
Psalms:- “The sea saw [it], and fled: Jordan was driven back. The mountains skipped like rams, [and] the little hills like lambs.” Psalms 114፡ 3-4.
መዝሙር ዳዊት፡- ባሕሪ ርእያቶ ሃደመት፥ ዮርዳኖስ ንድሕሪት ተመልሰ። ኣኽራን ከም ደዓውል፡ ኮረቢት ከም ዕያውቲ ተሰራሰሩ። መዝ 114፡3-4።
ቅዳሴ፡- ቅ. ድዮስቆሮስ (እምቅድመ ዓለም)

ስሌና ተጠምቀ

ኢየሱስ ክርስቶስ ኣብ 30 ዓመቱ ብኢድ ዮሃንስ መጥመቕ፡ ኣብ ሩባ ዮርዳኖስ ዝተጠምቀሉ ምኽንያት “ኩሉ ጽድቂ ክንፍጽም ይግብኣና’ዩ” ከም ዝበሎ፡ ስሌና ኪብል እዩ። ክርስቶስ ኣብ ሞንጎ እቶም ብግልጺ ኣብ ቅድሚ ኩሉ ህዝቢ ሓጢኣቶም ተኣሚኖም ብኢድ ዮሃንስ መጥመቕ ንኽጥመቁ ዝመጹ፡ ከም ሓደ ካብኦም ምምጻኡ ብቓልን ብግብርን ኪምህረና፤ ሥላሴ ዝተገልጽሉ ዕለት፡ እግዚኣብሔር-ኣቦ እቲ ዝፈትዎ ብእኡ ዝሰመርኩ ወደይ ስምዕዎሞ ምሕረት ኪትረኽቡ ኢኹም ኢሉ ዝመስከረሉ ዕለት ብምዃኑ ከኣ ፍሉይነት ኣለዎ። ኣብዚ ዕለትዚ ሰማይ ተኸፍተ፡ ጽልኢ ተደምሰሰ፡ ሰይጣን ሓፈረ። እግዚኣብሔር-ኣቦ እቲ ብተዋህዶ (ቃል ስጋ ኮነ) ንመስቀልን መስዋእትን ዝለኣኾ እንኮ ወዱ፡ ኣብ ክንዲ በደልና በጃ ኪኸውንን፡ ፍጥረት ኩሉ ዓለም ድማ ብደም ክርስቶስ ምሕረት ኪረክብን እዩ ዕላማ ጥምቀት። ከምቲ ጽሑፍ ዝብሎ “ነቲ ብሕጋጋት ዝቃወመናን ዚብኣሰናን ዝነበረ ብኢድ እተጻሕፈ ጽሕፈት ዕዳ ኪድምስስ” (ቆለ 2፡14) እዩ ኣብ ሩባ ዮርዳኖስ ዝተጠምቀ።

ዝተፈላለዩ መጻሕፍቲ ቤተክርስትያንና ነዚ ዓቢ ዕለትዚ ዝምልከት ዝተፈላለየ ኣገደስቲ ቃላት ሰኒዶምልና ኣሎዉ። ገለ ካብኡ ንምጥቃስ፡- “ኣንሶሰወ ገሐደ ወኣስተርኣየ ከመ ሰብእ በብሕቅ ልሕቀ ብሠላሳ ክረምት በዮርዳኖስ ተጠምቀ” ትርጉም “ብግልጺ ተመላለሰ፡ ከምሰብ በብእዋኑ ዓበየ፡ ተራእየ፡ ኣብ ሰላሳ ዓመቱ ኣብ ዮርዳኖስ ተጠምቀ” (ቅዳሴ ዘድዮስቆሮስ)። “ተጠምቀ በማይ እንዘ ለሊሁ ቅዱሰ ቅዱሳን ከመ ይቀድስ ኪያከ ቃለ-ኣብ ተሰምኣ በዮርዳኖስ ወረደ መንፈስ ቅዱስ ዲበ ርእሱ ከመ ተኣምር ከመ ላእሊሁ ወልድ ውእቱ ዘመጽኣ ለኅሢሦትከ” ትርጉም “ ንሱ ናይ ቅዱሳን ቅዱስ ክነሱ፡ ምእንቲ ኪቕደሰና ኢሉ ኣብ ዮርዳኖስ ተጠምቀ፡ ናይ ኣቦ ድምጺ ተሰመዐ፡ መንፈስ ቅዱስ ከኣ ብኣምሳል ርግቢ ኣብ ልዕሌኡ ዓለበ፡ እዚ ኩሉ ዝኾነ ከኣ ንዓኻ (ንጥፉእ) ኪደሊ ከምዝመጸ ምእንቲ ከረድእ እዩ”። (ኣረጋዊ መንፈሳዊ)። “በልደቱ ተርህወ ሰማይ ወበጥምቀቱ ተኣውቀ መለኮቱ፡ መንግስቱ ስፋኒት ዘእምቅድመ ዓለም ንጉስ ውእቱ ወኣልቦ ማህለቅት ለመንግስቱ”። ትርጉም “ብልደቱ ሰማይ ተኸፍተ፡ ብጥምቀቱ መለኮቱ ተፈልጠ፡ መንግስቱ ዘልኣለማዊት እያ፡ ንመንግስቱ ድማ መወዳእታ የብሉን” (ሊቅ)። “ኣኮ ዘረከበ ጸጋ በተጠምቆቱ ኣላ ከመ ያብርህ መካናተ ወያኃይል ማያተ ለእለ ሃለዎሙ ይጠመቁ ውስቴታ”። ትርጉም “ጸጋ ኪረክብ ኣይተጠምቀን፡ ምእንቲ እቶም ካብኡ ንደሓር ዝጥመቑ፡ ንሩባ ዮርዳኖስ ክቕድስ፡ ንኹሉ ማያት ከኣ ኪባርኽ እዩ ዝተጠምቀ”። (ሊቅ)። “ኣኮ ፈቂዶ ለተጠምቆ ኣላ ከመ የኃበነ ሱታፌ ንጹህ።” ትርጉም “ምስኡ ብቕድስና ሓድነት ምእንቲ ኪህልወና ስሌና ተጠምቀ እምበር ንኽጥመቕ ስለ ዘድልዮ ኣይኮነን።” (ሊቅ)።

ስለዚ ክቡራት ክርስትያን: ኣምላኽናን መድሓኒናን ክርስቶስ ብጥምቀቱ'ውን ዓቢ ትምህርቲ ገዲፉልና ኣሎ። ብኣና ሸነኽከ እምነት ክርስትናና ከመይ ኣሎ? ሎሚ እቲ ካብ ጥምቀት ዝተመሃርናዮ ዓጽኒዕና ክንሕዝ፤ ከምቲ እግዚኣብሔር-ኣብ ንክርስቶስ ዝመስከረሉ፡ “እዚኣቶም እቶም ዝፈትዎም ደቀይ እዮም” ኢሉ ስሌናውን ምስክሩ ምእንቲ ኪህብ ንዕኡ ዚበቕዕ ህይወትን ናብራን ኪህልወና ኪንጋደል ይግባእ። 

እግዚኣብሔር ናይ በረኸት ሰባት ይግበረና። ኣሜን።