ትግርኛ

ናብ ፖፕ ቴዎድሮስ ካልኣይ፡ መበል 118 ፓትርያርክ መንበረ ቅዱስ ማርቆስ ዘእስክንድርያ።

መንፈሳዊ ሰላምታና ብምቕዳምን በረኽትኩም ብምሕታትን፡ ኣብ ቅዱስ ማርቆስ ካቴድራል ብዕለተ ሰንበት 11 ታሕሳስ 2016 (ጎርጎርያን)፡ ኣብ ማእከል ቅዳሴ፡ ብዝተፈንጀረ ቦምብ፡ ዘጋጠመ ቅዝፈት ፍቱዋት ምእመናን ብኸቢድ ከምዘሕዘነና ንገልጽ።

ስለዞም ፍቱዋት ሰማዕታት ጸሎተ ፍትሓት ከምዝገበርናን፡ ነቶም ዓሚ ብ16 የካቲት 2015 (ጎርጎርያን) ኣብ ሊብያ ብሰማዕትነት ዝሓለፉ ብምዝካርን፡ ቤተክርስቲያን ኣብ ዘመንና'ውን ስለ እምነቶም ሰማዕትነት ዝኸፍሉ ምእመናን መራሕትን ምርካባ ከሐጉሰና ከሎ፡ በቲ ካልእ ሸነኽ፡ ስለቶም ኣብ ሸዊት ዕድሜኦም፡ ብኣስካሕካሒ ኣገባብ፡ ብጸላእቲ ቤተ ክርስቲያን፡ ሕይወቶም ካባና ዝተፈልየት ደቅናን ኣሕዋትናን ድማ ዓምዩቕ ሓዘን ይስምዓና። እዞም ብርሃን ዓለምን ጨው ምድርን ንጹሓት፡ ሰዓብቲ ክርስቶስ ብምዃኖም ጥራይ ብጸላእቲ ቤተክርስቲያን ንሞት ኪፍረዱ ከሎዉ፡ ነቲ ቤተክርስቲያን ግብጺ “ናይ ሰማዕታት ቤተክርስቲያን” ዝብል ታሪኻዊ መሠረት ዘሎዎ ኣበሃህላ ዘራጉድ እዩ። እምነት ክርስቶስ ሰማዕታት የፍሪ፡ ሰማዕታት ድማ ንቤተ ክርስቲያን ክርስቶስ ዱኽዒ ኮይኖም ከምዘዕብይዋን ከምዘጽንዕዋን “ደጌታት ሲኦል ኣይሕይልዋን…” ዝብል ቅዱስ ጽሑፍን ታሪኽን ምስክር እዮም።

ኦርቶዶክሳዊት ቤተ ክርስቲያን ኤርትራ፡ ኣብታ እኖን ሓፍትን ዝኾነት ግብጻዊት ቤተክርቲያን ተዋሕዶ ዝወርድ ዘሎ ግፍዒ ስለዘሻቕላ ወትሩ ከምእትጽሊ እንዳረጋገጽና፤ ኣብ ክልትኤን ኣሓት ኣብያተ ክርስቲያናት ወሪዱ ዘሎ ብዓይነቱ ዝፈላለ፡ ብትሕዝቶኡ ግን ተመሳሳሊ ፈተና ብዓወት ክንሰግሮ ልዑል ኣምላኽ ይሓግዘና። ከምቲ ኣብ ቅዱስ ጽሑፍ ዝተጻሕፈልና "...በታ ሓንሳእ ንቕዱሳት እተዋህበት እምነት ክትጋደሉ ጽሒፈ ኽመኽረኩም፡ ናይ ግዲ ዀነኒ።” ይሁዳ 1፡4፤ ከም ኣቦታትና ኣብ እምነት ክንጸንዕን ሕዝብና ብመገዲ ሓቅን ፍቕርን ክንመርሕን የብቅዓና።

እግዚኣብሔር ነፍሳት ሰማዕታት ኣብ መንግስተ ሰማያት የዕርፈልና፡ ንቤተ ሰብን ቤተክርስቲያንን ዘጸናንዕን ዝናዝዝን መንፈስ ቅዱስ ይልኣኽ።

ቀኖናዊ ኣኅጉረ ስብከታት ሰሜን ኣመሪካ፡ ኤውሮጳን ማእከላይ ምብራቕን