መንግስቲ ኤርትራ ንኣቶ ዮፍታሄ ድሜጥሮስን ጸሓፊኡ ዝነበረ ኣቶ ሃብቶም ርእሶምን ካብ ቤተ ክርስቲያን ተዋሕዶ ሰጒጉዎም ከምዘሎ ተረጋጊጹ ኣሎ። እዚ ስጉምቲ'ዚ ዝውሰድ ዘሎ፡ ኣቶ ዮፍታሄ ዲሜጥሮስን ቀሺ ሃብቶም ርእሶምን ካብ ቤተ ክርስቲያን ተዋህዶ ክእለዩ፡ ገዳማት ኤርትራ  ኣብዚ ዝሓለፈ ክልተ ሰሙን ጥርዓን ድሕሪ ምቕራቦም እዩ። ገዳማት ኤርትራ ኣብ ዘቅረብዎ ጥርዓን፥ ኣቶ ዮፍታሄ ድሜጥሮስን ጸሓፊኡን ንዓሰርተ ዓመታት ዝተጎዓዝዎ ጉዕዞ ኣብ ቤተ ክርስቲያን ከቢድ ሃስያ ከም ዘውረዱ ብምጥቃስ፥ ኣብ ርእሲኦም ዳግማይ ውግዘት ስለዝገበረ፡ መንግስቲ ኤርትራ ከምዚ ዓይነት ስጉምቲ ከምዝወሰደ ዝረኸበናዮ ዜና ይሕብር።

መንግስቲ ኤርትራ ነዚ ስጉምቲ ዝወሰዶ፡ ድምጽን ጠለብን ገዳማት ኤርትራ ስለዘገደሶ ድዩ ? ንዝብል ሕቶ ንግዚኡ ንህዝብን ኣንበብትን ንሓድጎ። እቲ ሓቂ ግና መንግስቲ ኤርትራ ባዕሉ ብዝመዘዞ ኣቶ ዮፍታሄ ዲሜጥሮስን ጸሓፊኡ ኣቶ ሃብቶም ርእሶምን ኣብ ልዕሊ ቤተ ክርስቲያን ተዋህዶ ከቢድ ዕንወትን ጥፍኣትን ወሪዱ እዩ። ብሰሪ እዚ ዘይቅዱስ ኪዳን፡ ማእለያ ዘይብሎም ካህናት ካብ ቤተ ክርስቲያን ክስጐጉ እንከለዉ፡ መነኮሳት ድማ ገዳሞም ሓዲጎም ተሰዲዶም እዮም። በደል ዘይብሎም ካህናትን መነኮሳትን ፈቐዶ ቤትማእሰርትን ጎዳጉድን ይበልዩ ኣለዉ። ብሓፈሻ፡ ውሉድ ኣገልገልቲ ቤተ ክርስቲያን ካህናት ክዝኽትሙ፥ ኣንስቲ ካህናት ክልምናን ኣብ ሓደጋ ክወድቃን፥ ቤተ ክርስቲያን መኣዝና ክትስሕትን ክትከፋፈልን ተገይሩ እዩ። ኣብ ክንዲ ብፍቕሪ ምትሕቑቛፍ፥ ንኽስን ጸለመን ዝህንጠዩ ገርህታት መንእሰያት ብምውፋር፥ ንምዝራቡ ዘስደምም ገበን ኣብ ቤተ ክርስቲያን ተፈጺሙ እዩ። ፓትርያርክ ቅዱስ ኣቡነ እንጦንዮስ፡ ሕጋዊ መራሒ ናይታ ፍርቂ ህዝቢ ኤርትራ ዝኽተላ ቤተ ክርትያን ተዋህዶ፡ ብዘይ ሕጊ ካብ መዓርጎም ወሪዶም ኣብ ማሕዩር ካብ ዝኣትዉ ድሮ ሸሞንተ (8) ዓመታት ኮይኑ ኣሎ።

ተሓታቲ ናይዚ ኩሉ ዓመጽን ገበንን ድማ እቲ ለኣኽን ልኡኹን ከምዝኾኑ ዘካትዕ ኣይኮነን።

ሕጋዊ መራሒ ቤተ ክርስቲያን ተዋህዶ ፓትርያርክ እንጦንዮስ ኣብ መንበሮም ተመሊሶም፡ ቤተ ክርስቲያን ተዋህዶ ድማ ብሓደ መጓሰ ክትምራሕ ምእንቲ፥ ክቡራን ገዳማውያን ኣቦታትን ካህናትን፥ ብጸሎትን ብትብዓትን ስለ ቤተ ክርስቲያን ዝጀመርክምዎ መንፈሳዊ ውግእ፡ ብፍቕርን ብሓድነትን ብጸሎትን ክትቅጽልዎ እናኣተሓሳሰብና፡ ሃገረ ስብከታት ሰሜን ኣሜርካ፥ ኤውሮጳን ማእከላይ ምብራቕን ኣብ ዝቅጽል ግዜ መግለጺ ከውጽእ ምዃኑ ንሕብር።

እግዚኣብሔር ቤተ ክርስቲያንናን ሃገርናን ይባርኽ።