ብፁዕ ኣቡነ ማቴዎስ ጳጳስ ሃገረ ስብከት ድባርዋን ከባቢኣን ዓሪፎም

ብፁዕ ኣቡነ ማቴዎስ ጳጳስ ንኡስ ሃገረ ስብከት ድባርዋን ከባቢኣን ብዕለት 27 ሕዳር 2011 ኣ.ፈ ኣብ መበል 79 ዓመት ዕድሜኦም ከም ዝዓረፉ ዝበጽሓና ሓበሬታ የረድእ።

ዕረፍቲ ኣቡነ ማቴዎስ (ኣባ ኣብርሃም) “ብሕማም ምኽንያት” እኳ እንተ ተባህለ፥ ቅድሚ ሕማሞም ንልዕሊ 3ተ ኣዋርሕ ዝኣክል ካብ ጉባኤ ዮፍታሄን ኣባ ዲዮስቆሮስን ተፍልዮም ከም ዝነበሩ ክፍለጥ ተኻኢሉ ኣሎ። ንኣዋርሕ ዝኣክል ከኣ ብጓህን ሕማምን እንዳተሳቐዩ ካብ ሰብ ዳርጋ ተፈልዮም ከምዝጸንሑን ሕክምና ክረኽቡ ከምዘይከኣሉን ዝረኸብናዮ ሓበሬታ ይገልጽ።

ብፁዕ ኣቡነ ማቴዎስ ካብቶም ብ2005 ኣ.ፈ ብጸሎተ-ቡራኼን ብምንባር ኢድ 3ይ ፓትርያርክ ቅዱስ ኣቡነ እንጦንዮስ ማዕርግ ጵጵስና ዝተቐብኡ ኣርባዕተ ጳጳሳት ሓደ ኢዮም። ይኹን እምበር ኣብቲ ብ18 ሓምለ 2005 ኣ.ፈ (፲፩ ሓምለ ፲፱፻፺፯ ዓ.ም) ብውዲት ዮፍታሄ ድሜጥሮስን ኣማኸርቱን ዝተዳለወ ናይ ቅዱስ ኣቡነ እንጦንዮስ መኽሰሲ ደብዳቤ ብኃይሊ ተገዲዶም፥ ኣብ ዘይኣምኑሉን ኣብ ዘይፈልጥዎን ጉዳይ ሓቢሮም “ታሪኻዊ-ጥልመት” ምስ ዝፈጸሙ ጳጳሳት ኢዶም ኣንቢሮም ምፍራሞም ብሓቂ ዘሕዝን እዩ።

መንበረ ጵጵስና ሰሜን ኣሜሪካ ብምኽንያት ሞት ኣቡነ ማቴዎስ ሓዘን እናተሰምዖ ነዚ ዝስዕብ ኣገዳሲ መልእኽቲ ናብ ኩሎም ጳጳሳት ተዋህዶ፥ ውሉደ-ክህነትን ህዝበ-ክርስቲያንን የመሓላልፍ።

1. ሥጋዊ ሞት ዘይተርፍ ዕጫ ናይ ኩሉ ወዲ-ሰብ ብምዃኑ ብዕረፍቲ ኣቡነ ማቴዎስ ሓዘን ይስምዓና።

2. ብህይወት ዘሎዉ ጳጳሳት ነቲ ዝፈረምዎ “ንሓቅን ሕጊ-ሃይማኖትን” ዝጥሓሰ ጥልመት ተረዲኦም ምሕረትን ንስሓን ክሓቱ እቲ ግዜ ሕጂ እዩ፥

3. ብቅዱስ ኣቡነ እንጦንዮስ ንዝተነብረሎም “ውግዘት” ዘኪሮም ኣብ ቅድሚ እግዚኣብሔርን ኣቡነ እንጦንዮስን ቀሪቦም ፍትሓትን ሥርየት-ኃጢኣትን ክሓቱ፥

4.ነቲ ኣብ ልቦም ዘሎ ውሽጣዊ ጓህን ሓዘንን ኣፎም ከፊቶም ነቶም ንቤተ ክርስቲያን ተዋህዶ ኣብ ሕንፍሽፍሽን ውግዘትን ኣብጺሖማ ዘለዉ ዓመጽቲ ብቕሉዕ ክግስጽዎም፥

5.ኣቦታት ጳጳሳት “ዕድመኹም ከየብቅዐ፥ ሞት ከየርከበ” ንነሳሕ ክትብሉ፣ ምስ ፓትርያርክ እንጦንዮስ ድማ ክትዕረቑ ሕጂ ግዚኡን እዋኑን እዩ ንብል።

ደጊምና፣ ነቲ ሓዋርያ ያዕቆብ “ሕይወትኩምሲ ንቝሩብ ጊዜ ተራእዩ ደሓር ዝበንን ሃፋ ኢኹም” ዝብል ጥቕሲ መሰረት ጌርና፥ ነፍሲ ወከፍ ኦርቶዶክሳዊ ኣማኒ ኣብዛ ሓላፊት ዓለም ከሎ “ዘይሓልፍ ሠናይ-ታሪኽ እምነት” ፈጺምና ክንሓልፍ በዚ ኣጋጣሚ ከነዘኻኽር ንፈቱ (ያዕ 4፡14)።